Bikini Climber: వందకు పైగా పర్వతాలపై బికినీతో పోజులిచ్చిన ఆమె.. చివరికిలా దుర్మరణం!

ఎత్తైన పర్వతాలపై దుస్తులు విప్పి బికినీతో ఫొటోలకు పోజులిచ్చే ఆమె.. చివరికి అదే ప్రయత్నంలో లోయలో పడి దుర్మరణం చెందింది.

హైలైట్స్

• శనివారం తైవాన్‌లోని యుశాన్ నేషనల్ పార్క్‌లోని ఓ ఎత్తైన పర్వతంపైకి చేరిన గిగివు.. దుస్తులు విప్పుతూ లోయలో పడిపోయింది.
• లోయలో పడి చనిపోయిన ఆమెను కనుగోడానికి సుమారు 28 గంటల సమయం పట్టింది.

  ఆమె పేరు గిగి వు. తైవాన్‌కు చెందిన ఆమె ఎత్తైన పర్వత శిఖరాలు కనిపిస్తే చాలు చకచకా ఎక్కేసి దుస్తులు విప్పేసి బికినీతో నిలబడుతుంది. దీంతో ఆమెకు ‘బికినీ క్లైంబర్’గా సోషల్ మీడియాలో ఎక్కడాలేని పాపులారిటీ లభించింది. అయితే, ఆ ఆసక్తే తన ప్రాణాలు తీస్తుందని ఆమె ఎన్నడూ ఊహించలేకపోయింది

శనివారం తైవాన్‌లోని యుశాన్ నేషనల్ పార్క్‌లోని ఓ ఎత్తైన పర్వతంపైకి చేరిన గిగివు.. దుస్తులు విప్పుతూ లోయలో పడిపోయింది. తీవ్రంగా గాయపడిన గిగివు తన వద్ద ఉన్న శాటిలైట్ ఫోన్ ద్వారా తన స్నేహితులకు ఈ సమాచారం అందించింది. ఈ విషయం తెలియగానే అధికారులు ఆమెను రక్షించేందుకు సంఘటన స్థలికి వెళ్లారు.

హెలికాప్టర్ల సాయంతో ఆమె కోసం వెతికారు. వాతావరణం అనుకూలించకపోవడంతో ఆమెను చేరుకోలేకపోయారు. దీంతో రెస్క్యూ సిబ్బంది పర్వతారోహణ చేస్తూ ఆమె వద్దకు చేరుకున్నారు. కానీ, అప్పటికే ఆమె మరణించింది. చలి తీవ్రత ఎక్కువగా ఉండటం వల్ల ఆమె వద్దకు చేరడానికి సుమారు 28 గంటల సమయం పట్టిందని అధికారులు తెలిపారు. ఆమె శాటిలైట్ ఫోన్లో మాట్లాడినప్పుడు.. తన నడుం కింద శరీర భాగాలను కదపలేకపోతున్నానని తెలిపిందని, తాను సుమారు 65 నుంచి 100 అడుగుల ఎత్తు నుంచి లోయలో పడ్డానని చెప్పిందని పేర్కొన్నారు.

ఇటీవల ఓ ఇంటర్వ్యూలో గిగివు మాట్లాడుతూ.. గత నాలుగేళ్లలో 100 పైగా పర్వత శిఖరాలపై తాను బికినీతో పోజులిచ్చానని తెలిపింది. ‘‘నా వద్ద కేవలం 97 బికినీలే ఉన్నాయి. అందువల్ల కొన్ని పర్వత శిఖరాల వద్ద వేసిన బికినీలనే మళ్లీ వేసుకోవల్సి వచ్చింది’’ అని చెప్పింది. ఎందుకిలా చేస్తున్నారనే ప్రశ్నకు బదులిస్తూ.. ‘‘అలా చేయడం చాలా అందంగా, ఆహ్లాదకరంగా అనిపిస్తుంది’’ అని తెలిపింది.

2018 క్రిస్మస్ రోజున కూడా గిగి ప్రమాదానికి గురైంది. ఈ సందర్భంగా తన ఫేస్‌బుక్‌లో ‘‘దేవుడి దయవల్ల బతికి బయటపడ్డాను’’ అని పోస్ట్ చేసింది. ఆ ఘటన జరిగి నెల రోజులు కాకుండానే ఆమె ఇలా దుర్మరణం చెందడంపై.. ఆమె స్నేహితులను, అభిమానులు తీవ్ర ఆవేదన వ్యక్తం చేస్తున్నారు

Please Do Follow the page and share to your friends